د افغانستان ا.ا. د عامې روغتیا وزیر، ښاغلي مولوي نور جلال جلالي هرات ولایت ته د خپل رسمي سفر په ترڅ کې د دغه ولایت د روږدو درملنې روغتون څخه لیدنه وکړه
په دې لیدنه کې چې مل پلاوي او د هرات د عامې روغتیا رئیس مولوي محمد طالب شاهد یې ملتیا کوله، د عامې روغتیا وزیر د روغتون بېلابېلې برخې وکتلې، د روږدو کسانو د درملنې بهیر، شته امکانات او ناروغانو ته د وړاندې کېدونکو خدمتونو وضعیت یې له نږدې وارزاوه او له روغتيايي کارکوونکو يې وغوښتل، چې له ناروغانو سره غوره چلند وکړي.
ښاغلي وزیر، د روږدو کسانو درملنه او د هغوی لپاره د روغتیايي خدمتونو وړاندې کول د عامې روغتيا وزارت مسؤليت وباله او د خدمتونو لا ښه والي او د ناروغانو د اړتیاوو پوره کولو په موخه یې اړوندو مسؤلینو ته لازمې سپارښتنې وکړې.
