د خوړو او درملو معينيت د سندونو د تحلیل او فعالیتونو د تنظیم ریاست د همغږۍ میاشتنۍ غونډه ترسره شوه
دا غونډه د سندونو د تحلیل او فعالیتونو د تنظیم رئیس، مولوي محمد موسی فایق په مشرۍ د دې ریاست د آمرينو، مشاورينو او کارکوونکو په شتون کې ترسره شوه، چې موخه یې د سپارل شویو چارو د پرمختګ ارزونه، د لاسته راوړنو څېړنه، د بېلابېلو کاري برخو د ستونزو او ننګونو اورېدل او د کارکوونکو او مسئولینو ترمنځ د لا زیاتې همغږۍ رامنځته کول وو.
په دې غونډه کې ښاغلي فایق د ژمنتیا تر څنګ د مسئولیت منلو او اداري نظم پر اهمیت ټینګار وکړ او له کارکوونکو یې وغوښتل، چې خپلې سپارل شوې دندې په غوره ډول ترسره کړي.
نوموړي همدارنګه د اسلامي او اداري اصولو پر مراعت، له همکارانو او مراجعینو سره پر نیک او له درناوي ډک چلند، د همکارۍ د روحیې پر ساتلو او د خدمت کولو فرهنګ پر پیاوړتیا ټینګار وکړ.
سربېره پر دې، د سندونو د تحلیل او فعالیتونو د تنظیم رئیس د اداري سلسله مراتبو مراعتول، د وظیفوي تداخل مخنیوی، د دندو د لایحو اړوند د چارو ترسره کول، د کاري بهیرونو چټکتیا او د کره او پر وخت راپورونو وړاندې کول د بریالیتوب او کاري اغېزمنتیا مهم عوامل وبلل او له ټولو کارکوونکو يې وغوښتل، چې د خوړو او درملو معینیت د موخو تحقق لپاره خپلې هڅې لا زیاتې کړي.
دغه راز په دې غونډه کې ګډونوالو د خپلو کاري برخو اړوند نظرونه، وړاندیزونه، ستونزې او ننګونې شریکې کړې او د چارو د ښه والي او اداري همغږۍ د پیاوړتیا لپاره د مناسبو حل لارو په اړه بحث او خبرې تر سره شوې.
