د عامې روغتیا وزارت د معالجوي طب لوی ریاست کې د معلولینو د فزیکي بیارغونې (احیای مجدد) روغتون د شته ستونزو حل او خدماتو پراختیا په موخه ناسته ترسره شوه
په دې ناسته کې چې د معالجوي طب لوی رئیس ډاکټر وحدت الکوزي، د تخصصي او ثالثي روغتونونو رئیس ډاکټر امین الله مومند، د شیخ زاید نیور ساینس ملي او تخصصي روغتون رئیس ډاکټر اسدالله عصمت او د معلولینو د فزیکي بیارغونې روغتون مسؤلینو شتون درلود، د یاد روغتون د شته ستونزو حل او د تشکیل بیا کتنې او ارزونې او روغتیایي کارکوونکو ته یې د روزنیزو ټریننګونو جوړېدو په اړه بحث او خبرې ترسره شوې او هم د دې روغتون لپاره د اړتیا وړ تجهیزاتو برابرولو په موخه یوه ځانګړې کمېټه وټاکل شوه؛ تر څو د اړینو تجهیزاتو د برابرولو چارې پر وخت او سمه توګه ترسره شي.
د معالجوي طب لوی رئیس، ډاکټر وحدت الکوزي د معلولینو د فزیکي بیا رغونې روغتون د ستونزو په اساسي ارزونه او حل ټینګار وکړ او په دې اړه یې د لازمو اقدامات سپارښتنه وکړه، څو د دغه روغتون خدمات اغېزمن، معیاري او د خلکو له اړتیاوو سره سم ترسره شي.
