معین عرضه خدمات صحی وزارت صحت‌عامه ا.ا.ا در نشست بین‌المللی همکاری‌های بشری صحی و ارتقاء مصوونیت جمعی در دوحه اشتراک کرد
محترم مولوی عبدالولی حقانی معین عرضه خدمات صحی وزارت صحت‌عامه ا.ا.ا، در رأس یک هیأت رسمی، در نشست بین‌المللی مربوط به همکاری‌های بشری صحی و ارتقاء مصوونیت جمعی، که در شهر دوحه کشور قطر برگزار شده بود، اشتراک کرد.
این نشست به هدف تقویت هماهنگی و تلاش‌های مشترک میان شرکایی صحی، نهادهای بین‌المللی و کشورهای کمک‌کننده برگزار گردیده بود.
هدف اصلی هیأت افغانی از اشتراک در این نشست، تنظیم و هماهنگی کمک‌های صحی جهانی مطابق با اولویت‌ها، پالیسی ملی صحت و نیازهای سیستم صحی افغانستان بود، تا کمک‌ها مؤثر، شفاف و پایدار واقع شوند.
همچنان هیأت افغانی تأکید نمود که، تنظیم کمک‌ها در چتر پالیسی ملی، نه‌تنها کیفیت خدمات را بلند می‌برد، بلکه باعث مدیریت بهتر منابع نیز می‌گردد.
محترم مولوی عبدالولی حقانی، بر اهمیت تأمین منابع مالی پایدار و رو به افزایش برای سکتور صحی افغانستان به‌ویژه در عرصه تطبیق واکسین، خدمات ابتدایی صحی، صحت مادر و طفل و آماده گی در برابر امراض عاجل، تأکید ورزید.
محترم معین عرضه خدمات، از کمک‌کننده‌گان بین‌المللی خواست تا همکاری‌های مالی و تخنیکی‌شان را برای سکتور صحی افغانستان بیشتر نمایند وی همچنان گفت: که وزارت صحت‌عامه باورمند است که چنین نشست‌های جهانی در تقویت همکاری‌های مشترک، اعتمادسازی و تأمین خدمات صحی عادلانه و پایدار برای مردم افغانستان بسیار مؤثر است.
از سوی‌هم، محترم معین عرضه خدمات صحی افزود، که وزارت صحت‌عامه متعهد است تا با تمام شرکایی بین‌المللی، در پرتو پالیسی ملی صحت، همکاری‌های مؤثر و پایدار داشته باشد.
