وزارت صحت عامه با همکاری ریاست عمومی المپیک، تربیت بدنی و ورزش افغانستان، نشست آگاهی‌دهی عامه را به هدف جلوگیری و کنترول بیماری شکر برگزار کرد
در این نشست، محترم مولوی عبدالولی حقانی معین عرضه خدمات صحی وزارت صحت‌عامه، شماری از رئیسان مرکزی و متخصصین این وزارت، حافظ احمد جان ځدران معاون مسلکی ریاست عمومي المپیک، تربیت بدنی و ورزش افغانستان، از ورزشکاران بخش های مختلف و نماینده‌گان رسانه‌ها اشتراک داشتند.
محترم مولوی عبدالولی حقانی، ورزش بدنی و فعالیت فزیکی را برای حفظ سلامت، جلوگیری از بیماری شکر و سایر بیماری‌های مزمن و تأمین یک زنده‌گی سالم مهم دانسته گفت: « جوانان و ورزشکاران کشور ما نمونه‌ای خوب برای جامعه‌اند؛ آنان هر روز نشان می‌دهند که فعالیت منظم فزیکی و زنده‌گی سالم، نماد قدرت و خوشی است.»
همچنان، محترم معین عرضه خدمات صحی افزود، که معینیت عرضه خدمات صحی وزارت صحت‌عامه، مطابق به رهنمود گسترده ا.ا.ا، کمپاین‌های آگاهی‌دهی ملی را با همکاری نهادهای ورزشی، تعلیمی، رسانه‌ای و علمای دینی گسترش می‌دهد تا پیام زنده‌گی سالم به هر خانه رسانیده شود.
همچنان، داکتر حیدر خان حیدر، رئیس عمومی طب وقایوی وزارت صحت‌عامه، در مورد جلوگیری، عوامل خطر و تشخیص بیماری شکر، رهنمودهای مهمی ارائه کرد. او این نشست را گامی مؤثر در راستای ایجاد جامعه سالم، فعال و مصوون از بیماری‌ها دانست و بر ضرورت بلند بردن سطح آگاهی مردم تأکید کرد.
از سوی‌هم، حافظ احمد جان ځدران، معاون مسلکي ریاست عمومي المپیک، تربیت بدنی و ورزش افغانستان در مورد اهمیت ورزش و زنده‌گی سالم صحبت نموده و تعهد همکاری همه‌جانبه کمیته ملی المپیک را در برگزاری چنین برنامه‌ها با وزارت صحت‌عامه اعلام کرد.
در ادامه این برنامه، تعدادی از متخصصین وزارت صحت‌عامه، نیز در مورد علایم، جلوگیری، تداوی و طرز زنده‌گی سالم در ارتباط به بیماری شکر صحبت‌های همه‌جانبه نمودند و هدایات لازم را به اشتراک‌کننده‌گان ارائه کردند.
در پایان این برنامه، ورزشکاران از بخش‌های مختلف با همکاری کمیته ملی المپیک نمایش‌های ورزشی اجرا نمودند تا جوانان به ورزش تشویق شده، اهمیت فعالیت فزیکی برای مردم واضیح شده و نقش ورزش در جلوگیری از بیماری‌های مزمن مانند شکر به گونه مؤثر بیان گردد.
