د عامې روغتیا وزارت له لوري د ننګرهار او لغمان لپاره له OPHA مؤسسه سره د ۶۴۱ زره ډالرو تړون لاسليک شو
د عامې روغتیا وزارت له لوري د ننګرهار او لغمان ولايتونو اوسېدونکو لپاره د روغتيايي خدمتونو پياوړتيا او پراختيا په موخه له OPHA مؤسسې سره (۶۴۱۸۰۸) د شپږ سوه یو څلوېښت زره او اته سوه اته ډالرو په ارزښت تړون لاسليک شو:
دا تړون د یو کال لپاره لاسليک شو، چې له مخې به يې د ۹ بنسټیزو (BHC) روغتيايي مرکزونو له لارې د ننګرهار او لغمان ولايتونو اوسېدونکو ته لومړني روغتيايي خدمتونه وړاندې کېږي.
د عامې روغتیا وزارت مسؤلينو وويل، ياد تړون د روغتيايي خدمتونو کيفيت لوړولو، ورته د لاسرسي زياتولو او د ولس د روغتيايي ستونزو کمولو په موخه لاسليک شو، چې په پلي کېدو سره به یې د ننګرهار او لغمان ولایتونو ۱۱۳ زره او ۶۰۰ تنه اوسېدونکي له لومړنیو خدماتو برخمن او ۹۰ تنو ته به په روغتیايي برخه کې د کار زمينه هم برابره شي.
بل لور، د OPHA مؤسسې استازو هم ډاډ څرګند کړ، چې ياده پروژه به د څه باندې یو کال په ترڅ کې د ټولو ټاکل شويو معيارونو سره سمه پلي کړي او د خلکو روغتيايي اړتیاوو پوره کولو ته به ځانګړې پاملرنه کوي.
