د افغانستان ا.ا. د عامې روغتیا وزیر ښاغلي مولوي نور جلال جلالي په خپل کاري دفتر کې د زابل له والي ملا شېر محمد شريف او د دغه ولایت د عامې روغتیا له رئیس سره لیدنه وکړه
په دې لیدنه کې د زابل د عامې روغتیا رئیس، ډاکټر میرویس افغان، د دغه ولایت د روغتیايي وضعیت، شته ستونزو او اړتياوو په اړه هر اړخیز معلومات وړاندې او د ماشومانو د روغتیايي ستونزو کمولو او د خدمتونو د پراختیا په موخه یې د روغتیايي ټیمونو د زیاتوالي غوښتنه وکړه؛ څو اړمنو خلکو ته پر وخت روغتیايي خدمات وړاندې شي.
دغه راز، د زابل والي د عامې روغتیا وزارت له پروګرامونو او هڅو د ملاتړ تر څنګ د روغتیايي خدمتونو ښه والي لپاره د همغږۍ او ګډ کار پر دوام ټینګار وکړ.
د عامې روغتیا وزیر، د زابل د روغتیايي وضعیت ښه والي په موخه د همکارۍ او لازمې پاملرنې ډاډ څرګند او ويې ويل: د خدمتونو د پراختيا په موخه د هېواد په ۳۱۸ ولسواليو کې عمومي روغتونونه جوړيږي، چې زابل ولايت يې هم برخه دی.
