د عامې روغتیا وزارت مرستیال په ننګرهار کې د پیوې کنډو ۵۰ بستریز روغتون روغتیايي خدمتونه وارزول
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ولایت ته د خپل رسمي سفر په ترڅ کې د روداتو ولسوالۍ د پیوې کنډو ۵۰ بستریز روغتون څخه لیدنه وکړه
د دې لیدنې موخه په یاد روغتون کې د وړاندې کېدونکو روغتیايي خدمتونو ارزونه وه، چې په ترڅ کې د روغتیايي خدمتونو وړاندې کولو مرستیال او مل پلاوي د روغتون بېلابېلې څانګې وکتلې، د روغتیايي کارکوونکو فعالیتونه یې وارزول او د خدمتونو لا ښه والي او کیفیت لوړولو په موخه یې اړوندو مسؤلینو ته لازمې سپارښتنې وکړې.
همدارنګه، ښاغلي مرستیال د ننګرهار عامې روغتیا ریاست، یونیسیف او تطبیق کوونکو مؤسسو ترمنځ د همغږۍ پر اهمیت ټینګار وکړ؛ تر څو د روغتونونو اړتیاوو ته پر وخت رسېدنه وشي او خلکو ته روغتیايي خدمتونه په اغېزمن، شفاف او معیاري ډول وړاندې شي.
