د عامې روغتیا وزارت بېړني روغتیايي ټیمونه د کونړ په پېښه کې د زلزلې د قربانیانو تر څنګ ولاړ دي
د عامې روغتیا وزارت د رهبرۍ په ځانګړې لارښوونه بېړني روغتیایي ټیمونه لا هم د پېښې په ځای کې فعال حضور لري او د درملنې او ژغورنې عملیات په پرلهپسې توګه دوام لري.
دغه ټیمونه چې د مرکز او ختیځو ولایتونو څخه کونړ ولایت ته رسېدلي دي، د پېښې له امله ځپل شویو هېوادوالو ته لومړنۍ روغتیایي مرستې، درملنې او د ژوند د ژغورنې عملیات ترسره کوي.
د عامې روغتیا وزارت ژمن دی، چې د زلزلې قربانیانو د ژوند خوندیتوب، بیړنیو اړتیاوو پوره کولو او اړینو روغتیایي خدمتونو وړاندې کولو کې به هېڅ هڅه ونه سپموي.
د عامې روغتیا وزارت ډاډ ورکوي، تر څو چې د پېښې وضعیت عادي شوی نه وي، یاد ټیمونه به خپلو فعالیتونو ته دوام ورکوي او د خلکو روغتیایي اړتیاوې به له پامه ونه غورځوي.
هیره دې نه وي چې یو شمېر نور روغتیايي ټیمونه هم له مرکز او ولایتونو څخه د پېښې ځای ته روان دي تر څو د تېرې شدیدې زلزلې قربانیانو ته روغتیايي خدمات وړاندې کړي.
