د عامې روغتیا وزارت د ظرفیت لوړونې ریاست له لوري د انتاناتو کنټرول او مخنیوي (IPC) برخه کې د استادانو روزنې (TOT) څلور ورځنی روزنیز پروګرام ترسره شو
د دې پروګرام موخه په مرکز کابل کې د رابعه بلخي، اندراګاندي د ماشومانو درملنې او استقلال روغتونونو او همدارنګه، د ننګرهار، هرات، فاریاب او پکتیا ولایتونو د روغتیايي کارکوونکو د علمي او عملي وړتیاوو لوړول وو؛ ترڅو په روغتیايي مرکزونو کې د انتاناتو د کنټرول او مخنیوي معیارونه په اغېزمن ډول پلي کړي.
د دې روزنیز پروګرام په ترڅ کې د انتاناتو د کنټرول اصولو، د ناروغیو د لېږد مخنیوي، د وقایوي تدابیرو مراعتولو، د انتاني خطرونو مدیریت او روزونکو ته د معیاري تدریس د لارو چارو اړوند مهم موضوعات د تجربه لرونکو استادانو له لوري په نظري او عملي بڼه وړاندې شول.
ګډونوالو هم په بحثونو او عملي تمرینونو کې فعاله برخه واخیسته او په دې برخه کې یې اړینه پوهه او مهارتونه ترلاسه کړل.
