د عامې روغتيا وزارت د روغتيايي خدمتونو وړاندې کولو معینیت کې د کندهار ولایت د ميرويس سيمه ييز روغتون د ارتقاء، ريفورم او خدماتو ښه والي په موخه ناسته ترسره شوه
دا ناسته د عامې روغتيا وزارت د روغتيايي خدمتونو وړاندې کولو مرستیال، ښاغلي مولوي عبدالولي حقاني په مشرۍ د دې وزارت د مرکزي رئیسانو په شتون کې د ميرويس روغتون د خدماتو پياوړتيا، د بستونو شمېر زياتوالي، په دې روغتون کې د پولي کلينيک او ICU څانګې جوړولو، شته منابعو، بشري سرچينو او ظرفيتونو ارزونې په موخه ترسره شوه.
ښاغلي مولوي عبدالولي حقاني د پلان او پالیسۍ لوي رئيس ډاکټر سيد رسول منګل په مشرۍ يوې ځانګړې تخنيکي کميټې ته دنده وسپارله، چې د ميرويس روغتون د شته ظرفيتونو، ستونزو ارزونې او لازم تطبیقي چوکاټ جوړولو په موخه کندهار ولایت ته سفر ترسره او د روغتون د ظرفيت لوړونې، خدماتو ښه والي او پياوړتيا لپاره بشپړ مطالعات ترسره کړي.
