د خصوصي روغتیایي مرکزونو له لوري د زلزله ځپلو لپاره د وړیا خدمتونو ژمنه
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوی عبدالولی حقانی ننګرهار ولایت ته د سفر په ترڅ کې د یاد ولایت د خصوصي روغتیایي مرکزونو له مسؤلینو سره لیدنه ترسره کړه
یاده لیدنه د زلزلې زیانمنو شویو ته د وړیا روغتیایي خدمتونو د وړاندې کولو په موخه ترسره شوه، چې په کې د خصوصي روغتیایي مرکزونو له مسؤلینو وغوښتل شول، ترڅو په دې سختو ورځو کې خپلو زیانمنو هېوادوالو ته وړیا روغتیایي خدمتونو وړاندې کړي او د یو مسلمان په توګه خپل ایماني او وجداني مسؤلیت ادا کړي.
بل لور د خصوصي روغتیایي مرکزونو مسؤلینو د ښاغلي مولوي عبدالولي حقاني غوښتنه ومنله او ژمنه یې وکړه، چې د زلزله ځپلو لپاره به د روغتیایي خدمتونو په وړاندې کولو کې هېڅ ډول هڅې او کوښښونه ونه سپموي.
د یادونې وړ ده، چې دغه خصوصي روغتیایي مرکزونه ټول اړین روغتیایي خدمتونه، لکه معاینات، د عمومي داخله او عمومي جراحي خدمتونه، درمل او نور اړین روغتیایي خدمتونه د زلزله ځپلو لپاره په وړیا ډول وړاندې کوي.
