جوزجان ولایت کې د يو روغتيايي مرکز ودانۍ جوړه او ګټې اخیستنې ته وسپارل شوه
د افغانستان اسلامي امارت د عامې روغتیا وزارت له لوري د جوزجان ولايت خواجه دوکوه ولسوالۍ په دښتې ليلیې سيمه کې د پنځوس زره امریکایي ډالرو په لګښت د يو روغتيايي مرکز ودانۍ جوړه او ګټې اخیستنې ته وسپارل شوه.
په همدې موخه جوړو شویو مراسمو کې د عامې روغتيا وزارت د مالي او اداري چارو مرستيال، مولوي محمد اسحق صاحبزاده، د جوزجان ولايت د عامې روغتيا رئيس قاري ذبيح الله حسيني او يوشمېر نورو مسؤلینو ګډون کړی و.
د عامې روغتيا وزارت د مالي او اداري چارو مرستيال، مولوي محمد اسحق صاحبزاده په همدې موخه جوړو شویو مراسمو کې وویل، دې ولایت ته یې د سفر موخه سپينو او د لرې پرتو سیمو اوسېدونکو ته د روغتيايي خدماتو رسول دي.
نوموړي زیاته کړه، چې دغه روغتیايي مرکز د پنځوس زره امریکايي ډالرو په لګښت جوړ شو او ورسره به د ځايي اوسېدونکو روغتيايي ستونزې تر ډېره حل شي.
