د عامې روغتيا وزير، ښاغلي مولوي نور جلال جلالي په خپل کاري دفتر کې د هېواد د ۱۶ ولايتونو له قومي مخورو سره ليدنه وکړه
په دې ليدنه کې د بېلابېلو ولايتونو قومي مخورو د خپلو سيمو د روغتيايي اړتياوو او غوښتنو په اړه خبرې تر سره او د عامې روغتيا وزارت له رهبرۍ يې وغوښتل، چې لرې پرتو سيمو ته دې د روغتيايي خدمتونو رسولو لپاره ځانګړې پاملرنه وشي؛ څو د هېواد ټول وګړي وکولای شي په اسانه توګه خدماتو ته لاسرسی ولري.
د عامې روغتيا وزير ولس ته د باکيفيته روغتيايي خدمتونو وړاندې کولو ډاډ څرګند او ويې ويل: د اسلامي امارت مشرتابه او عامې روغتيا وزارت ژمن دي، چې د هېواد ټولو وګړو ته معیاري او عادلانه روغتيايي خدمتونه ورسوي.
ښاغلي وزير زياته کړه، د روغتيايي خدمتونو د پراختيا په موخه د هېواد په ۳۱۸ ولسواليو کې د عمومي روغتونونو د جوړېدو لړۍ پيل شوې، چې له بشپړېدو سره به يې زرګونه هېوادوال روغتيايي خدمتونو ته اسانه لاسرسی ومومي.
