عامې روغتیا وزارت له لوري د ازموینو ملي ادارې په همکارۍ د کابل اړوند روغتيايي علومو انسټېټيوټونو فارغانو څخه د ایګزیټ ازموینه واخیستل شوه
د يادې ازموینې پرانیست غونډه د عامې روغتیا وزارت د خصوصي انسټیټیوټونو رئیس مولوي محمد ګلاب راشد، د ازموینو ملي ادارې مرستیال شیخ رحیم الله حقاني، استادانو او اړوندو مسؤلینو په شتون کې ترسره شوه.
د عامې روغتیا وزارت د خصوصي انسټېټیوټونو رئیس، مولوي محمد ګلاب راشد وويل: (دا ازموینه په معياري او شفاف ډول اخيستل کېږي او له هر ډول لاسوهنو پاکه ده او ګډونوال به د خپلې وړتیا مطابق پایلې ترلاسه کړي).
همدارنګه، د ازموینو ملي ادارې مرستیال د طبي برخو د زده کړو ارزښت په اړه وينا تر سره او زیاته یې کړه، چې دا ازموینه په شفافه فضا کې اخيستل کېږي او د ګډونوالو حقونه به خوندي وي.
د يادونې وړ ده، چې د عامې روغتيا وزارت له لوري به د ازموينو ملي ادارې په همکارۍ د هېواد په نورو زونونو کې د روغتيايي علومو انسټېټيوټونو فارغانو څخه هم د ایګزیټ ازموینه واخیستل شي.
