د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د خوړو نړیوال پروګرام (WFP) له عمومي رئیس، ښاغلي جان ایلیف او مل پلاوي سره لیدنه وکړه
په دې لیدنه کې د عامه تغذیې خدماتو د پراختیا او پیاوړتیا، د خوړو نړیوال پروګرام د روانو فعالیتونو او مرستو، د عامه تغذیې پروګرامونو د لا ښه والي او اغېزمنتیا، د راتلونکو پلانونو او همکاریو څرنګوالي او یو شمېر نورو موضوعاتو په اړه هر اړخیز بحث او خبرې وشوې.
د عامې روغتیا وزیر د خوړو نړیوال پروګرام د عمومي رئیس او مل پلاوي هرکلی وکړ او ویې ویل، چې د عامه تغذیې خدماتو پراختیا د هېواد له مهمو روغتیايي اړتیاوو څخه ده او په دې برخه کې باید مرستې لا منظمې، دوامداره او د خلکو د واقعي اړتیاوو پر بنسټ تنظیم شي.
ښاغلي وزیر زیاته کړه، عامې روغتیا وزارت له نړیوالو مرستندویه بنسټونو سره د همغږۍ او ګډو همکاریو پراختیا ته ژمن دی، څو وکولای شي د روغتیا په ټولو برخو کې خلکو ته باکیفیته او اغېزمن خدمات وړاندې کړي.
بل لور، د خوړو نړیوال پروګرام عمومي رئیس د عامې روغتیا وزارت له رهبرۍ څخه د مننې ترڅنګ د خپلو مرستو او فعالیتونو په اړه معلومات وړاندې کړل او زیاته یې کړه، چې د کونړ ولایت له زلزله ځپلو او بیرته راستنېدونکو کډوالو سره د مرستو او همکارۍ پلان لري. همداراز، نوموړي د تغذیې برخه کې د خپلو مرستو د دوام او پراختیا ډاډ ورکړ.
