د څېړنې مېتودولوژۍ اوونیز کورس لومړۍ دوره پیل شوه
د عامې روغتیا وزارت د اکمال تخصص لوی ریاست او کورنیو چارو وزارت د روغتیایي چارو لوی ریاست په ګډه همکارۍ د څېړنې مېتودولوژۍ اوونیز کورس لومړۍ دوره د تخصص بشپړولو پروګرام د استادانو او ټرېني ډاکټرانو لپاره پیل شوه.
یاد کورس د علمي او څېړنیزو مهارتونو د پیاوړتیا په موخه طرحه شوی، چې ټول ټال پنځه دورې لري؛ درې دورې د ټرېني ډاکټرانو او دوه دورې د استادانو لپاره ځانګړې شوې دي، چې په هره دوره کې به ۳۰ تنه ټرېني ډاکتران او ۱۶ تنه استادان ګډون کوي.
د کورنیو چارو وزارت لومړي مرستیال، ښاغلي مولوي محمد نبي عمري په خپله وینا کې د پولیسو ملي او تخصصي روغتون د ډاکترانو له هڅو مننه وکړه او هغوی ته يې د همکارۍ ډاډ ورکړ.
ورته مهال، د عامې روغتیا وزارت د اکمال تخصص لوی رئیس ډاکتر نثار احمد نیازي د تخصص بشپړولو پروګرامونو ته په اشارې وویل، د اکمال تخصص لوی ریاست هڅه کوي، چې د څېړنې میتودولوژۍ کورسونه لا پراخ او معیاري کړي؛ تر څو ټریني ډاکتران او استادان د نړیوالو معیارونو مطابق طبي څېړنې ترسره کړي. دغه راز، نوموړي ګډونوالو ته د هېواد په کچه تخصصي روغتونونو کې د تخصصي پروګرامونو اړوند معلومات وړاندې کړل.
همدارنګه، د کورنیو چارو وزارت د روغتیایي چارو لوی رئیس مولوي صدیق الله بدر د معیاري زده کړو پر ارزښت ټینګار وکړ او د ډاکترانو هڅې یې وستایلې.
تمه ده، چې د یاد کورس له لارې به د ګډونوالو څېړنیز مهارتونه پیاوړي او هم به د علمي څېړنو کیفیت لوړ شي.
