د عامې روغتیا وزارت د رهبرۍ بورډ غونډه تر سره شوه
دا غونډه چې د عامې روغتیا وزیر، ښاغلي مولوي نور جلال جلالي په مشرۍ د وزارت د ټولو مرستیالانو او مرکزي رئیسانو په شتون کې تر سره شوه ، اړوندو مسؤلیتونو ته چارو ته د لا ښې پاملرنې ، مسؤولیت ته پر وخت حاضرېدو، د عقودو له نوي قانون سره سم تدارکاتي پروسو کې د شفافیت، ښه والي او د چارو چټکتیا، په روغتونونو او روغتیايي مرکزونو کې د اړتیا وړ درملو او تجهیزاتو د شتون او پیرېدلو، د درملو برخه کې د داخلي تولیداتو د پیاوړتیا او لومړیتوب ورکولو او د ادارو تر منځ د لا زیاتې همغږۍ او د صحت طفل روغتون قلبي څانګې ته د لا زیاتې پاملرنې اړوند بحث او خبرې تر سره شوې.
د عامې روغتیا وزیر، په پورته ذکر شویو موضوعاتو ټینګار وکړ او تخنیکي کمېټې یې وټاکلې؛ تر څو په دې اړه جدي او عملي اقدامات تر سره کړي.
دغه راز، د عامې روغتیا وزارت مرستیالانو او مرکزي رئیسانو د چارو د ښه ترسراوي په موخه خپل نظرونه او وړاندیزونه شریک کړل او ژمنه یې وکړه، چې د ذکر شویو موضوعاتو په اړه به لازم اقدامات تر سره کړي.
