د عامې روغتیا وزارت مرستیال د خاص کونړ سل بستریز مؤقت روغتون څخه لیدنه وکړه
د ا.ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني کونړ ولایت د سفر په ترڅ کې د خاص کونړ ولسوالۍ په نظامي قرارګاه کې د زلزله ځپلو لپاره د ځانګړي شوي مؤقت سل بستریز روغتون څخه لیدنه وکړه
د دې لیدنې موخه په دغه روغتون کې د وړاندې کېدونکو روغتیايي خدمتونو ارزونه او په یاده پېښه کې د ټپي شویو ناروغانو له نږدې لیدنه وه.
د یاد روغتون څخه د لیدنې پرمهال د عامې روغتیا وزارت د معالجوي طب لوی رئیس، ډاکټر وحدت الکوزي د مل تخنیکي ټیم سره په ګډه د روغتون خدمتونه واروزل او د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ته یې ډاډ ورکړ، چې په دې روغتون کې د زلزلې له امله ټپي شویو هېوادوالو ته د ټولو لومړنيو روغتیايي خدمتونه وړاندې کولو زمینه برابره ده او روغتیايي ټیم هم په بشپړه ژمنتیا چمتو دی، چې خپلو زیانمنو شویو هېوادوالو ته روغتیايي خدمتونه وړاندې او د هغوی ستونزو ته رسېدنه وکړي.
د روغتیایي خدمتونو وړاندې کولو مرستیال د یاد روغتون د روغتیايي کارکوونکو هڅې وستایلي او هغوی ته یې سپارښتنه وکړه، چې په دې سختو ورځو کې د زیانمنو شویو هېوادوالو لاسنیوی وکړي او د روغتیايي خدمتونو وړاندې کولو برخه کې له هېڅ ډول هڅو درېغ ونه کړي.
