د ا.ا.ا. د عامې روغتیا وزارت نوې جوړې شوې ملي پالیسۍ د تشریح کولو ورکشاپ غونډه ترسره شوه
په دې غونډه کې د عامې روغتیا وزیر ښاغلي مولوي نور جلال جلالي، د وزارت ښاغلو مرستیالانو، مرکزي او ولایتي رییسانو، د چارو ادارې د څارنې او پالیسۍ مرستیال ښاغلي مولوي سیف الدین تائب، د ملي دفاع او پوهنې وزارتونو استازو د عالیقدر امیر المؤمنین (حفظه الله) د حکمونو او فرمانونو د تعقیب نظارت لوی ریاست د تفتیش مرستیال مولوي محسن هاشمي او د یو شمېر نورو امارتي ادارو مسؤلینو او استازو ګډون کړی و.
د عامې روغتیا وزیر، ښاغلي مولوي نور جلال جلالي ټولو هېوادوالو ته د مساویانه او معیاري روغتیايي خدمتونو وړاندې کولو په موخه د روغتیا وزارت له لوري د راتلونکو پنځه کلونو لپاره نوې جوړه شوې ملي پالیسي خورا اړینه وبلله او دا یې د اسلامي امارت له واکمنېدو راپدېخوا د روغتیا په برخه کې یوه ستره لاسته راوړنه یاده کړه.
د عامې روغتیا وزیر وویل: ( د یادې پالیسۍ پر مټ به شته امکاناتو ته په کتو له خپلو کاري شریکانو سره د منظمو اصولو او ګډې همغږۍ له لارې روغتیايي برخه کې پر مخ ځو او د ولسونو هوساینې لپاره به ټول لومړیتوبونه د دغه پالیسۍ له مخې ټاکل کېږي ).
ښاغلي وزیر دغه راز زیاته کړه، کوښښ کوو چې د هېواد ټولو اوسېدونکو ته یوشان معیاري خدمات وړاندې کړو، چې دې موخې ته د رسېدو لپاره یو منظمې او ملي پالیسۍ ته اړتیا وه، چې له نېکه مرغه روغتیا وزارت وتوانېد په لومړي ځل د خپلو داخلي متخصصینو په مرسته دا پالیسي جوړه کړي، چې له مخې به یې د راتلونکو پنځو کلونو لپاره د هېواد ټولو وګړو ته د غوره روغتیايي خدمتونو وړاندې کېدو تر څنګ دې برخه کې ګڼ شمېر پرمختګونه ترسره شي.
په دې غونډه کې همداراز د عامې روغتیا وزارت روغتیايي پراختیا او پالیسۍ مرستیال، ښاغلي ډاکټر محمد حسن غیاثي د یادې پالیسۍ پر محتویاتو هر اړخیزه وینا ترسره او ویې ویل: په دغه پالیسۍ کې به په اووه عمده برخو کار کېږي؛ ترڅو موږ وکولای شو خپل لومړني، دویمي او درېمي (ثالثي) خدمات لا معیاري کړو.
بل لور د چارو ادارې د څارنې او پالیسۍ مرستیال، ښاغلي مولوي سیف الدین تائب په منظمه توګه د چارو ترسره کولو لپاره د پالیسۍ شتون اړین وباله او په همدې موخه یې د روغتیا وزارت نوې جوړه شوې ملي پالیسي د روغتیايي برخې پیاوړتیا او پراختیا لپاره یوه ستره لاسته راوړنه وبلله.
د یادې غونډې په دوام د عامې روغتیا وزارت د پلان او پالیسۍ لوی رییس، ډاکټر سید رسول منګل د دغه پالیسۍ جوړولو په کړنلارو او مراحلو هر اړخیزه وینا ترسره او د دې پالیسۍ د تطبیق برخه یې د لا زیات کوښښ او ژمنتیا ډاډ څرګند کړ.
