ملا بخت الرحمن شرافت د یوې غونډې په ترڅ کې د عامې روغتیا وزارت د مالي او اداري چارو مرستیال په توګه معرفي شو
په دې مراسمو کې د عامې روغتیا وزیر ښاغلي، مولوي نور جلال جلالي، د چارو ادارې مرستیال ښاغلي، مولوي عبدالباري عاطف، د عامې روغتیا وزارت مرستیالانو، رئیسانو او کارکوونکو ګډون کړی و.
په غونډه کې د چارو ادارې مرستیال ښاغلي، مولوي عبدالباري عاطف وویل: د امیرالمؤمنین حفظه الله د فرمان په اساس د چارو د لا ښه والي په موخه ښاغلی، ملا بخت الرحمن شرافت د عامې روغتیا وزارت د مالي او اداري چارو مرستیال په توګه معرفي شو.
همدارنګه د چارو ادارې مرستيال د احکامو اطاعت د اسلامي امارت په نظام کې يو اصل یاد کړ او د عامې روغتيا وزارت نوي او پخواني مرستیالانو ته يې د خداى جل جلاله له دربار څخه په خپلو دندو کې د لا زياتو برياليتوبونو هيله وکړه.
د یادې ناستې په دوام کې د عامې روغتیا وزیر ښاغلي، مولوي نور جلال جلالي د اسلامي امارت د رهبرۍ له لوري په نظام کې تغیرات د چارو د ښه والي او د لا زیاتو خدمتونو د وړاندې کولو او خلکو ته د اسانتیاوو رامنځته کولو لپاره اړین وباله او زیاته یې کړه، اسلامي امارت کې د احکامو اطاعت یو اصل دی چې موږ ټول یې اطاعت کوو.
ښاغلي، مولوي نورجلال جلالي د عامې روغتیا وزارت مالي او اداري چارو لپاره ملا بخت الرحمن شرافت یو تجربه کار، با استعداده او په کار پوه شخص وباله او د متعال رب له دربار څخه یې ورته د خلکو په خدمت کې د بریالیتوبونو هیله وکړه.
دغه راز یې د عامې روغتيا وزارت د مالي او اداري چارو د پخواني مرستیال ښاغلي مولوي محمد اسحاق صاحبزاده د ترسره کړو خدمتونو يادونه وکړه او ورته یې د ټولګټو چارو وزارت کې د نوې دندې د بریالیتوب هیله وکړه.
له بلې خوا په دې غونډه کې د عامې روغتیا وزارت د خوړو او درملو مرستیال مولوي حمدالله زاهد، د عامې روغتیا وزارت د دفتر لوی رئیس ښاغلي شیخ الحدیث محمد طاهر حلیم او د عامې روغتیا وزارت د مالي او اداري چارو پخواني مرستیال ښاغلي مولوي محمد اسحاق صاحبزاده په غونډه کې د اطاعت تر سره کړیو خدماتو او خدمت په اړه خبرې وکړې.
