د عامې روغتیا وزیر د کشم ولسوالۍ اړوند، د ثمرقندي اساسي روغتیايي مرکز څخه لیدنه ترسره کړه
د عامې روغتیا وزیر، ښاغلي ډاکټر قلندر عباد او ورسره مل پلاوي بدخشان ولایت ته د خپل سفر په ترڅ کې د کشم ولسوالۍ اړوند، د ثمرقندي اساسي روغتیايي مرکز څخه لیدنه ترسره کړه
په دې لیدنه کې د عامې روغتیا وزیر، ښاغلي ډاکټر قلندر عباد په یاد روغتیايي مرکز کې د خدمتونو د وړاندې کېدو له بهیر څخه د لیدنې سربېره له روغتیايي کارکوونکو څخه مننه وکړه او له هغوی یې وغوښتل، چې د ناروغانو روغتیایي ستونزو د حل او درملنې په برخه کې لا زیاتې هڅې وکړي.
له بل لوري د یاد روغتیايي مرکز کارکوونکو د عامې روغتیا وزیر سفر بدخشان ولایت ته د روغتیايي حالت د ارزونې په موخه یو اړین ګام یاد کړ او ژمنه یې وکړه، چې د ناروغانو روغتیايي ستونزو ته د رسېدو او درملنې په برخه کې به له هیڅ ډول هڅو او کوښښونو درېغ ونه کړي.
