د عامې روغتیا وزارت اړوند جمهوریت روغتون د ریفورم او په دې روغتون کې هېوادوالو ته د معیاري روغتیايي خدمتونو وړاندې کېدو په موخه ناسته ترسره شوه
ياده ناسته کې د عامې روغتیا وزارت د پلان او پالیسۍ عمومي ریاست د رئیس، ډاکټر میرویس احمدزي، د جمهوریت روغتون د منظمو روغتیايي چارو پر مخ وړولو لپاره د جوړې شوې کمېټې د مشر، ډاکټر ایمل وردګ او ګڼ شمېر نورو مسؤلینو شتون کې ترسره شوه، چې د جمهوریت روغتون د ریفورم په برخه کې د اړتیا وړ په بېلا بېلو طبي ماشینونو او تجهیزاتو د یاد روغتون پر سمبالولو، د نویو روغتیايي څانګو پر فعالولو، د روغتون د غوره مدیریت لپاره د نویو کسانو پر ګمارنو او ورته نورو موضوعاتو اړوند په کې بحث او خبرې ترسره شوې.
د عامې روغتیا وزارت د پلان او پالیسۍ عمومي رئیس، ډاکتر میرویس احمدزي د جمهوریت روغتون د ریفورم په برخه کې پورتنیو موضوعاتو ته پر اشارې د یادې کمېټې له غړو وغوښتل، چې له دې روغتون څخه له نږدې لیدنه ترسره او د اړتیا وړ ټول موضوعات نوټ کړي؛ تر څو د راتلونکو اجرااتو لپاره د عامې روغتیا وزارت له مقام سره شریک شي.
