مولوي حمدالله زاهد د درملو وارداتو اسانتیاوو لپاره روسیې ته سفر وکړ
د عامې روغتیا وزارت د خوړو او درملو مرستیال، ښاغلی مولوي حمدالله زاهد او مل پلاوی افغان سوداګرو ته د درملو واردولو برخه کې د اسانتیاوو رامنځته کولو په موخه روسیې هېواد ته په سفر ولا
دا سفر د افغانستان او روسیې ترمنځ د دوه اړخیزو اړیکو پیاوړتیا او ستراتیژیکو همکاریو پراختیا، د خوړو او درملو تأمین، تنظیم او په ځانګړې توګه افغان سوداګرو ته د معیاري، خوندي او د باور وړ درملو او خوراکي توکو د وارداتو برخه کې د اغېزمنې اسانتیا رامنځته کولو په موخه تر سره شو
د دې سفر په ترڅ کې به د عامې روغتیا وزارت د خوړو او درملو پلاوی د روسیې د درملو او روغتیايي محصولاتو د تنظیمي ادارو له مسؤلینو سره لیدنې او خبرې وکړي او هم به د معیارونو همغږي، د ثبت او راجسټریشن بهیر د اسانتیا، د کیفیت د کنټرول میکانیزمونو ښه والي او د اغېزمنو همکاريو د چوکاټونو جوړولو په اړه هر اړخیز بحثونه ترسره شي.
همدارنګه، د روسیې د درمل جوړولو معتبرو شرکتونو څخه لیدنه، د تولیدي ظرفیتونو ارزونه، د درملو د تولید او کیفیت کنټرول په برخه کې له پرمختللو ټکنالوژیو سره اشنا کېدل او د پانګونې برخه کې د ګډو همکاریو زمینه برابرول هم د دې سفر له مهمو موخو څخه شمېرل کېږي، چې له لارې به یې د درمل جوړونې برخه کې د تجربو تبادله، د ظرفیتونو لوړونه او د ګډو همکاریو د پراختیا لپاره عملي فرصتونه رامنځته شي.
