عامې روغتيا وزارت له لوري د ملاريا ناروغۍ ملي پروګرام د بیا کتنې يو ورځني ورکشاپ غونډه تر سره شوه
په دې غونډه کې د عامې روغتيا وزارت د روغتيايي خدمتونو وړاندې کولو مرستيال ښاغلي مولوي عبدالولي حقاني، د وزارت يو شمېر مرکزي رئيسانو، د روغتيا نړيوال سازمان (WHO)، UNDP، او تطبیق کوونکو مؤسسو مسؤلينو او استازو ګډون کړی و.
د عامې روغتيا وزارت د روغتيايي خدمتونو وړاندې کولو مرستیال، ښاغلي مولوي عبدالولي حقاني وويل:(۲۰۲۵ م کال زموږ د ګران هېواد لپاره له بېلا بېلو سختو ننګونو ډک کال و، خو سره له دې ټولو محدودیتونو، موږ وتوانېدو چې د ملاريا د پېښو په شمېر کې د ۲۰۲۴ م کال په پرتله نږدې ۱۵ سلنه کموالی راوړو، چې دا يو مهم او هيله بښونکی پرمختګ دی).
ښاغلي مرستيال زياته کړه، دا ورکشاپ د ملاريا ناروغۍ د کنټرول ملي پروګرام د فعاليتونو ارزونې او د راتلونکو کلونو لپاره د اغېزمنو تګلارو د طرحې مهم فرصت دی او د عامې روغتیا وزارت ژمن دی، چې په دې برخه کې خپلې هڅې لا پياوړې او له خپلو کاري شریکانو سره نږدې همکاري ولري.
دغه راز، د ملاريا او نورو ناقله ناروغيو د کنټرول آمر، ډاکټر حزب الله فطرت د ياد پروګرام د لاسته راوړنو په اړه وويل:( د روغتيا نړيوال سازمان وروستیو سپارښتنو پر اساس ۲۰۲۵ م کال کې د ملاريا، لشمانيا او ډينګي ناروغيو درملنې ملي لارښودونه نوي شوي، ۲۰ آوټ بريکونه کنټرول شوي، له روغتيايي مرکزونو څخه نظارتونه تر سره شوي او د ملاريا د کنټرول په موخه نورستان کې ۱۲۱۰۰۰، پکتيکا کې ۱۷۵۰۵۱، کابل کې ۵۳۳۰۰، غزني کې ۲۷۲۵۰ او همداراز، په شرقي زون کې اميندواره مېندو ته ۲۲۰۲۹۷ او په کونړ او ننګرهار کې زلزله ځپلو ته ۲۵۶۶۶ ماشلومي (پشه خانې) ويشل شوي دي).
په دې غونډه کې همداراز، د روغتیا نړيوال سازمان، UNDP او اړوندو نورو ادارو مسؤلینو د خپلو فعاليتونو راپورونه وړاندې او د ملاريا او نورو ناقله ناروغيو کنټرول برخه کې یې د همکارۍ ژمنې وکړې.
