د پولیو ناروغۍ تشخیصیه لابراتوار پیاوړتیا په موخه ناسته ترسره شوه
په یاده ناسته کې د پولیو له منځه وړلو ملي بېړني عملیاتي مرکز رئیس، ډاکټر عبدالقدوس بریالي، د روغتیا نړیوال سازمان، مرکزي او پولیو لابراتوار استازو ګډون درلود.
په دې ناسته کې د افغانستان پولیو لابراتوار د پیاوړتیا، ظرفیت لوړونې او اړوندو تخنیکي موضوعاتو په اړه د هر اړخیز بحث تر څنګ د یاد لابراتوار د کارکوونکو روزنې، د فعالیتونو پرمختګ، شته ستونزو او حل لارو اړوند هر اړخیز معلومات شریک شول.
د پولیو له منځه وړلو ملي بېړني عملیاتي مرکز رئیس، د پولیو لابراتوار بشپړ فعالولو پر اړتیا ټینګار وکړ او دا لابراتوار یې د پولیو ویروسي ناروغۍ د تشخیص او مخنیوي برخه کې د حیاتي ارزښت په توګه یاد کړ.
