د ننګرهار ولایت سپين غر ولسوالۍ مامندرې سيمه کې د ۷.۱ ميليون افغانيو په لګښت د يو (BHC) روغتیایي مرکز د جوړېدو ډبره کېښودل شوه
په همدې موخه جوړو شویو مراسمو کې چې د ننګرهار مرستيال والي مولوي غلام الرحمن حيدري، د عامې روغتیا رئیس مولوي امین الله شریف، یو شمېر نورو ولایتي رئیسانو او مسؤلینو شتون درلود، مرستیال والي وویل: دا روغتیایي مرکز د اميرالمؤمنين حفظه الله د ځانګړې پاملرنې له مخې په درې جريبه ځمکه په اساسي ډول جوړيږي، چې د سيمې اوسېدونکو ته به د روغتیایي خدماتو برخه کې اړينې اسانتياوې رامنځته کړي.
همدارنګه، د ننګرهار عامې روغتیا رئیس وویل: دغه مرکز به د يولس کسيز روغتيايي ټيم په لرلو سره د مور او ماشوم، تغذیې، واکسين او ګڼو نورو برخو کې خدمات وړاندې کوي.
