د عامې روغتیا وزیر په کنړ کې د نوي ابتدایي روغتیايي مرکز ودانۍ پرانیسته
د افغانستان اسلامي امارت د عامې روغتیا وزیر ښاغلي مولوي نور جلال جلالي، کنړ ولایت ته د رسمي سفر پر مهال د دې ولایت په تیشې سیمه کې د ۵ میلیونه افغانیو په لګښت د یو ابتدایي روغتیایي مرکز د جوړ شوي تعمیر پرانسته تر سره کړه:
یاد کلینیک چې د کنړ اوسېدونکي ډاکټر عبدالرحمن زماني په مالي مرسته جوړ شوی؛ څه موده وړاندې د عامې روغتیا وزیر ښاغلي مولوي نور جلال جلالي یې د بنسټ ډبره ایښې وه او په لږه موده کې یې چارې بشپړې او د روغتیایي خدماتو لپاره تیار شو.
ښاغلي وزیر د پرانستې پر مهال وویل، له نېکه مرغه چې نن ورځ د دې روغتیایي مرکز د تعمیر د پرانستې شاهدان یو، چې دا به د ولسونو لپاره خورا ګټور ثابت شي.
ښاغلي وزیر وویل، هڅه یې د متوازنو روغتیایي خدماتو پراختیا ده چې په دې برخه کې به خپلې هیڅ ډول هڅې و نه سپموي
