د عامې روغتیا وزارت د روږدو درملنې عمومي پروګرام ریاست د کارکوونکو د روزنیزو اړتیاوو پېژندنې، ارزونې او د هغوی د مسلکي ظرفیت لوړونې په موخه د ملکي خدمتونو انسټیټیوټ مسؤلینو سره ناسته ترسره کړه
په دې غونډه کې د ملکي خدمتونو انسټیټیوټ رئیس اسدالله هارون د دغه انسټیټیوټ د خدمتونو او فعالیتونو په اړه معلومات وړاندې او د اسلامي او مسلکي اخلاقو پر رعایت، د ادارې پر پیاوړتیا او د اخلاص له مخې يې د چارو پر ترسراوي ټینګار وکړ.
همدارنګه، د روږدو درملنې عمومي پروګرام د ظرفیت لوړونې مسؤول ډاکټر محمد رحیم اکبري، په هېواد کې د دغه پروګرام اړوندو روغتیايي مرکزونو په اړه معلومات وړاندې او د کارکوونکو د ظرفیت لوړونې برخه کې یې د ملکي خدمتونو انسټیټیوټ له مسؤولینو څخه د همکارۍ او ملاتړ له امله مننه وکړه.
د غونډې په پای کې د روزنیزو اړتیاوو ارزونې فورمې د روږدو درملنې عمومي پروګرام ریاست د کارکوونکو ترمنځ ووېشل شوې؛ څو هغوی خپلې روزنیزې اړتیاوې مشخصې او څرګنده شي، چې کارکوونکي په کومو برخو کې روزنې او د ظرفیت لوړونې ته اړتیا لري. د دغې اړتیا د سنجولو پایلې به د راتلونکو روزنیزو پروګرامونو د طرحې جوړولو برخه کې وکارول شي.
