د عامې روغتیا وزارت د خوړو او درملو د څارنې او پلټنې ریاست د کابل ښار په بېلابېلو ناحیو کې د درملو وارداتي شرکتونو، د درملو له عمده پلورنځيو او له یو شمېر ګدامونو څخه هر اړخیز نظارت ترسره کړ
د دې نظارت په ترڅ کې د معیاري چکلیستونو په اساس د درملو ۱۱۰ بابه وارداتي شرکتونه او ۳۳ بابه د درملو عمده پلورنځي تر څارنې لاندې ونیول شول.
د یادو څارنو پایله کې ۱۶ بابه د درملو وارداتي شرکتونه، چې په خپلو پخوانیو ثبتشویو ځايونو کې یې فزیکي حضور نه درلود، په نښه شول او ياده موضوع په رسمي ډول د درملو او روغتیایي محصولاتو د ثبت، جواز ورکولو او د صادراتو او وارداتو د تنظیم اړوندو ریاستونو سره شريکه شوه.
همدارنګه، ۹ بابه د درملو وارداتي شرکتونه، ۱ باب غیر رسمي ګدام او ۳۰ بابه د درملو عمده پلورنځي د معتبرو اسنادو نه شتون له امله په موقت ډول وتړل شول.
د کیفیت د کنټرول په برخه کې د شکمنو ۹ قلمه درملو نمونې د درملو او روغتیایي محصولاتو د کیفیت د کنټرول ریاست لابراتوار ته ولېږل شوې او یو قلم بېجوازه درمل ضبط شول. سربېره پر دې، ۴ بابه هغه د درملو عمده پلورنځي، چې مخکې تړل شوې وو، د پرلهپسې بیاکتنو لاندې نیول شوي دي.
د رسمي مکتوبونو په برخه کې په مجموعي ډول ۵۵ مکتوبونه د کندهار، ننګرهار، خوست او هرات ولایتونو د عامې روغتیا ریاستونو، همدارنګه د کابل ګمرک او نړیوال هوايي ډګر ته د بېلابېلو شرکتونو د درملو د خوندي تخریب (مصؤن يا خوندي هدر) په تړاو، د درملو او روغتیایي محصولاتو د صادراتو او وارداتو د تنظیم ریاست د واصله مکتوبونو پر بنسټ، تحرير او لېږل شوي دي.
سربېره پر دې، د قرنطین په برخه کې ۷۲۵ کارتنه او ۱۳ بورۍ بېلا بېل ډوله له نېټې تېر شوي درمل قرنطین شوي دي.
همدارنګه، ۲۵۰۰ کیلوګرامو څخه زیات غير معياري او له نېټې تېر درمل په ټاکل شويو سیمو کې له منځه وړل شوي دي.
