د عامې روغتیا وزارت اړوند ستوماتولوژي درملنې تخصصي ملي روغتون له لوري د خولې حفظ الصحې په موخه د عامه پوهاوي غونډه ترسره شوه
په دې غونډه کې د یاد روغتون مسئولینو له خوا د خولې حفظ الصحې د مراعت په روغتیايي ګټو او د نه پاملرنې له امله یې د پېښېدونکو زیانونو بیانولو تر څنګ ګډونوالو ته په عملي بڼه د خولې او غاښونو د برس استعمال طریقې وښودل شوې.
د ستوماتولوژي درملنې ملي روغتون رییس، ډاکټر محمد وزیر حامد په یادو مراسمو کې د خولې حفظ الصحې مراعت یو اړین عمل یاد کړ او دا یې د ګڼو ناروغیو د مخنیوي یوه مهمه وسیله وګڼله.
نوموړي دغه راز له خلکو وغوښتل چې د خولې حفظ الصحې ته ځانګړې پاملرنه وکړي، څو له پېښېدونکو ناروغیو خوندي شي.
