د عامې روغتیا وزارت اړوند د خوړو او درملو معینیت له لوري د ولایتونو د عامې روغتیا رئیسانو او کارکوونکو لپاره د خوړو او درملو چارو د تنظیم د نویو لارښودنو په اړه د پوهاوي دوه ورځنی ورکشاپ پرانیستل شو
په همدې موخه جوړ شویو مراسمو کې د عامې روغتیا وزیر، ښاغلي مولوي نور جلال جلالي، د عامې روغتیا وزارت د خوړو او درملو مرستیال، ښاغلي مولوي حمدالله زاهد، د عامې روغتیا وزارت یو شمېر مرکزي رئیسانو د خوړو او درملو معینیت بېلابېلو برخو مسؤلینو او ولایتي رئیسانو ګډون کړی و.
د عامې روغتیا وزیر، ښاغلي مولوي نور جلال جلالي د خوړو او درملو معینیت له لوري جوړ شوی نوی لارښود د خوړو او درملو برخې د کیفیت او خدمتونو معیاري کېدو لپاره اړین وباله او د یاد لارښود د ښه تطبیق اړوند سپارښتنې یې وکړې.
همدارنګه، ښاغلي وزیر روغتیايي خدمتونو کې پر شفافیت او د ستونزو حل په موخه په ګډې همغږۍ ټینګار وکړ.
د عامې روغتیا وزارت د خوړو او درملو مرستیال، ښاغلي مولوي حمدالله زاهد د دغه ورکشاپ موخه د خوړو او درملو په برخه کې د شته ستونزو حل وباله او هېواد ته د بې کیفیته خوړو او درملو د وارېدولو پر مخنیوي ټینګار وکړ او زیاته یې کړه، چې د دیاد لارښود په تطبیق سره به د خوړو او درملو برخه کې شته نیمګړتیاوې حل او د معیاري خدمتونو وړاندې کولو کې به ځانګړی رول ترسره شي.
یاد ورکشاپ کې د خوړو او درملو برخه کې د عامې روغتیا وزارت له لوري جوړ شوی طرزالعمل تشریح او د روغتونونو او درملتونو د فعالیتونو څرنګوالي په اړه هر اړخیز معلومات په پریزنټیشنونو کې وړاندې شول.
