د روغتیايي خدمتونو وړاندې کولو مرستیال په ننګرهار کې د شدید طوفان له امله د ټپي شویو هیوادوالو څخه لیدنه وکړه
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ولایت ته د خپل سفر په ترڅ کې په سیمه ییز روغتون کې د وړمې ورځې باران او شدید طوفان طبیعي پېښې له امله د ټپي شویو هېوادوالو له روغتیايي وضیعت او هغوی ته د روغتیايي خدماتو وړاندې کولو له بهیر څخه لیدنه وکړه
په دې لیدنه کې د روغتیايي خدمتونو وړاندې کولو مرستیال چې د ننګرهار عامې روغتیا رئیس، مولوي امین الله شریف او یو شمېر نورو مسؤلینو یې هم ملتیا کوله د سیمه ییز روغتون په بېلا بېلو روغتیايي څانګو کې یې د یادې پېښې له امله د ټپي شویو هېوادوالو څخه له نږدې لیدنه ترسره او له هغوي سره یې نغدي مرستې وکړې.
نوموړي همداراز د یاد روغتون له مسؤلینو سره د یوې ناستې په ترڅ کې د یادې پېښې له کبله د ټپي شویو روغتیايي حالت ته د رسېدنې او درملنې په برخه کې د هغوی د هڅو ستاینه وکړه او په نغدي ډالیو یې ونازول.
