د روغتیايي خدمتونو وړاندې کولو مرستیال د ننګرهار ولایت د شدید طوفان ځپلو سیمو څخه لیدنه تر سره کړه
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ولایت ته د خپل سفر په ترڅ د یاد ولایت د عامې روغتیا رئیس، الحاج مولوي امین الله شریف او یو شمیر نورو مسؤلینو په ملتیا د سره رود ولسوالۍ اړوند، شاه ناصر آغا او چهارباغ صفا سیمو څخه لیدنه ترسره کړه.
د عامې روغتیا وزارت روغتیايي خدمتونو وړاندې کولو مرستیال د هغو کورنیو سره، چې د وړمې ورځې باران او شدید طوفان طبیعي پېښه کې یې په زیات شمېر غړي شهیدان شوي وو نغدي مرستې وکړې.
نوموړي همداراز په پېښه کې د شهید شویو هېوادوالو روح ته د دعا کولو سربېره زیانمنو شویو کورنیو ته تسلیت ورکړ او په روغتیایي برخه کې یې د ځانکړې پاملرنې بشپړ ډاډ څرګند کړ.
