د اکمال تخصص برنامې د لا پیاوړتیا په موخه د بهر میشتو افغان متخصصینو سره انلاین مجلس تر سره شو
د عامې روغتیا وزارت د اکمال تخصص ریاست مسؤلینو د یوې ناستې په ترڅ کې د بهر مېشتو افغان متخصصینو سره د څېړنې پروسې او طبي ژورنال د معیاري کولو په موخه انلاین لیدنه ترسره کړه.
دغه ناسته د اکمال تخصص عمومي رئیس، ډاکټر محمد حیدر عمر په مشرۍ په بهرنیو هېوادونو کې د مېشت افغان متخصصینو او د اکمال تخصص ریاست مسؤلینو په شتون کې جوړه شوې وه، چې موخه یې د څېړنې پروسې او طبي ژورنال معیاري کول دي، ترڅو په نږدې راتلونکي کې د څېړنې میتود او ژورنال د مرکز کابل او ولایتونو په ټولو تخصصي روغتونونو کې د اړونده څانګو مسؤلینو، ټرینرانو او ټریني ډاکټرانو ته په معیاري توګه تدریس او عملي شي.
په دې لیدنه کې همداراز افغان بهر مېشتو متخصصینو د اکمال تخصص عمومي ریاست ته د یادو برخو د بډایه کولو په موخه د خپلو وړاندیزونه او نظرونو شریکولو سربېره د څېړنیزو کورسونو او ژورنالونو د تنظیم او په دې برخه کې د موادو او میتودونو د چمتو کولو هر اړخیز داډ ورکړ.
د یادونې وړ ده، چې د اکمال تخصص لوی ریاست تل هڅه کړې د تخصصي برنامو د بډایه کولو لپاره علمي معیارونه پلي او د ډاکټرانو علمي کچه لوړه کړي؛ ترڅو هېوادوالو ته په کور دننه معیاري خدمات وړاندې شي.
