د افغانستان اسلامي امارت د عامې روغتیا وزیر، ښاغلي مولوي نور جلال جلالي د پولیو پروګرام د همغږۍ په کلنۍ غونډه کې ګډون وکړ
په یاده غونډه کې، چې موخه یې د پولیو پروګرام اوسني پرمختګونو ارزول، په دې پروګرام کې د شته ننګونو په ګوته کول او حل لپاره یې د اغېزمنو لارو چارو موندل دي، د پولیو له منځه وړلو ملي بېړني عملیاتي مرکز رئیس الحاج ډاکټر عبدالقدوس بریالي، د ولایتونو روغتیا رئیسانو، د کتلوي معافیت پروګرام آمرینو او د پولیو برخې مسؤلینو ګډون کړی و.
د عامې روغتیا وزیر، ښاغلي مولوي نور جلال جلالي وویل: " د عامې روغتیا وزارت هڅه کوي د هېواد ټولو سیمو وګړو ته روغتیایي خدمات وړاندې کړي او په همدې موخه د نړیوالو شریکانو په همکارۍ په تطبیق کوونکو مؤسسو غږ کوم؛ څو په لرې پرتو سیمو کې ناروغانو ته غوره روغتیايي خدمات وړاندې کړي ".
ښاغلي وزیر همداراز زیاته کړه، د پولیو (ګوزڼ) واکسین د تطبیق پروګرام به هېوادوالو ته په ټولو سیمو، بانډو او مساجدو کې ترسره کېږي.
نوموړي دغه راز د ولایتونو روغتیا رئیسانو ته دنده وسپارله، چې د تطبیق کوونکو مؤسسو په چارو کې د ستونزو پر وخت د عامې روغتیا وزارت مقام ته خبر ورکړي.
