د ا.ا.ا. د عامې روغتیا وزیر، ښاغلي مولوي نور جلال جلالي په خپل کاري دفتر کې د چین له سفیر، ښاغلي ژاوشېنګ او مل تخنیکي پلاوي سره ولیدل
په دې لیدنه کې د چین هیواد له لوري د کندهار ولایت میرویس حوزوي روغتون او د کابل الشفاء روغتون د بیارغونې ، پراختیا او د عصري طبي تجهیزاتو برابرېدو اړوند خبرې ترسره شوې.
ښاغلي وزیر، د روغتیايي سیسټم پياوړتیا لپاره د روغتیايي کارکوونکو ظرفیت لوړول، د خدماتو پراختیا او په تجهیزاتو د روغتونونو سمبالېدل اړین وبلل او په همدې موخه یې د چین له سفیر او تخنیکي ټیم څخه د میرویس سیمه ییز روغتون بیا رغونې او پراختیا اړوند د لا پاملرنې غوښتنه وکړه نوموړي همدارنګه د کابل الشفاء روغتون د اړونده چارو لپاره ځینې موضوعات له راغلي پلاوي سره شریک کړل.
بل لور ته د چین هیواد سفیر خپلو دوامداره همکاریو ته په اشارې د میرویس سیمه ییز روغتون بیا رغونې او پراختیا، روغتیایي کارکوونکو د ظرفیت لوړولو او د اړینو طبي تجهیزاتو برابرولو اړوند د بشپړې همکارۍ ډاډ څرګند او ویې ویل، په نږدې راتلونکې کې به روغتیا وزارت سره د ګډې همغږۍ له لارې د میرویس سیمه ییز روغتون د بیا رغونې او پراختیا چارې پیل شي ، نوموړي همداراز وویل هڅه کوي د الشفاء روغتون اړوند هم خپله هر اړخیزه همکاري وکړي.
