د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د جاپان هېواد له نوي سفیر، ښاغلي کنیچي ماساموتو سره لیدنه وکړه
په دې لیدنه کې نوي سفیر ته د ښه راغلاست ویلو تر څنګ په روغتیايي برخه کې د جاپان هېواد د مرستې په ځانګړي ډول د جیکا ادارې له لوري د کابل افغان جاپان او انتاني تخصصي روغتونونو کې د راډیولوژي مراکزو جوړولو ، روغتیایي کارکوونکو د ظرفیت لوړونې، د روږدو ناروغانو د درملنې، د ساري او غیر ساري ناروغیو د کنټرول او د دواړو هېوادونو ترمنځ په روغتیايي برخه کې د دوامداره همکاریو په اړه بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي په روغتیايي برخه کې د جاپان هېواد له دوامدارې همکارۍ مننه وکړه او په یو شمېر مهمو برخو کې یې د دوی همکاري اړینه وبلله، ښاغلي وزیر د غیر ساري ناروغیو په مخنیوي، تشخیص، درملنه او ځینې نورو اړینو تخصصي برخو کې د ظرفیت لوړونې او اړینو همکاریو اړوند غوښتنې وکړې او په وینا یې هڅه یې دا ده، چې د ساري ناروغیو تر څنګ د غیر ساري ناروغیو مخنیوی هم په سمه توګه وکړي.
له بل لوري، د جاپان هېواد نوي سفیر روغتیا سکتور کې خپلو دوامداره همکاریو ته په اشارې د ساري او غیر ساري ناروغیو د کنټرول برخه کې د بشپړې همکارۍ او مرستې ډاډ څرګند کړ او زیاته یې کړه، موږ ژمن یو چې د عامې روغتیا وزارت سره همکارۍ ته دوام ورکړو
