د ا.ا.ا. د عامې روغتیا وزارت له لوري روغتیایې رضاکارانو ته د ټولنې په کچه د روغتیایي کارکونکو د کړنو، ارزونې او هڅونې تر سرلیک لاندې یو ورځنی ورکشاپ ترسره شو
په دې ورکشاپ کې د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني، د ناروغیو د مخنیوي او کنټرول لوی رئیس ډاکټر حیدرخان حیدر، د لومړنیو روغتیایي خدمتونو رئیس ډاکټر ذبیح الله حارث، د کورنیو او نړیوالو مؤسسو استازو او روغتیایي رضاکارنو ګډون کړی و ، د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني د روغتیایي رضاکارانو د ترسره کړیو فعالیتونو مننه وکړه او ډاډ یې څرګند کړ، چې په نږدې وخت کې به د ټولنې په کچه د روغتیایي خدمتونو بسته نوې او تازه کړي.
ښاغلي مرستیال زیاته کړه: (تېر کال د ټولنې روغتیایي رضاکارانو له څه باندې اووه لس میلیونه کورنیو څخه لیدنې کړي او اختلاطي زیږونونو ته د رسېدنې تر څنګ یې بېلابېل روغتیایي خدمتونونه وړاندې کړي).
ښاغلي حقاني دغه راز، له روغتیایي رضاکارانو غوښتنه وکړه، چې د روغتیایي سیستم ښه والي لپاره خپلو هڅو ته دوام ورکړي.
د یاد ورکشاپ وروستیو کې ګډونوالو ته د بېلا بېلو پریزنټېشنونو له لارې ترسره شوي فعالیتونه، لاسته راوړنې او د ظرفیت لوړونې اړوند معلومات وړاندې شول.
