د عامې روغتیا وزارت د پالیسۍ او پلان مرستیال د کندز له ولایتي روغتون څخه لیدنه وکړه
پنجشنبه، سلواغه ٢٨/١٤٠٠
د عامې روغتیا وزارت د پالیسۍ او پلان مرستیال ډاکتر محمد حسن غیاثي او مل پلاوي یې د خپل سفر په ترڅ کې د کندز ولایتي روغتون څخه لیدنه وکړه.
په دې لیدنه کې، د پاليسۍ او پلان مرستيال په دغه روغتون کې د روغتيايي خدمتونو د وړاندې کولو حالت له نږدې وڅېړه او روغتيايي مسوولينو ته يې لارښوونه وکړه چې د اړمنو کسانو روغتيايي حالت ته زياته پاملرنه وکړي.
له بلې خوا د دغه روغتون روغتيايي کارکوونکو خپلې ستونزې او وړانديزونه د عامې روغتيا وزارت له مشرتابه سره شريک کړل او د دغه وزارت له مشرتابه څخه يې د حل غوښتنه وکړه، چې په اړه يې لازمې لارښوونې وشوې.
سربېره پر دې، ډاکتر غیاثي په کندز ولایت کې د روغتیايي خدمتونو وړاندې کولو د پلي کوونکو مؤسسو له استازو سره وکتل او له هغوی سره یې په دغه ولایت کې د روغتیايي خدمتونو وړاندې کولو د ښه کولو او د مېزلس واکسین د کمپاین پیلولو په اړه خبرې وکړې.
همدارنګه، د پالیسۍ او پلان مرستیال د کندز ولایت له استازو او روغتیايي مسوولینو څخه وغوښتل چې دغه کمپاین دې ژر تر ژره پیل کړي څو په دغه ولایت کې د شري ناروغۍ د لا پراخېدو مخه ونیول شي.
