د پوهاند غضنفر روغتیایي علومو انسټيټیوټ څخه ۱۱۳ تنه زده کړیالان د غاښونو پروتیز، رواني روغتیا، عامه تغذیې او فارمسي څانګو څخه فارغ شول
په همدې موخه جوړو شویو مراسمو کې، د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، د روغتیایي خدمتونو وړاندې کولو مرستیال ښاغلي مولوي عبدالولي حقاني، د مقام د دفتر لوی رئیس شیخ محمد طاهر حلیم، د غضنفر انسټيټیوټ رئیس ډاکټر محمد قاسم عادل، مرکزي رئیسانو، استادانو او زده کړیالان ګډون کړی ؤ.
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي روغتیا برخه کې له یاد انیسټيټیوټ څخه د فارغ شویو زده کړیالانو رول مثبت وګاڼه او له فارغانو یې وغوښتل، چې د روغتیایي سیسټم په ښه والي او پیاوړتیا کې خپل رول په صداقت او امانت سره ترسره کړي.
همدارنګه، د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني فارغانو ته د مبارکي تر څنګ ژمنه وکړه، چې وزارت به د دوی له استعدادونو ، مهارتونو او ژمنتیا څخه ملاتړ کوي او فارغانو ته به کاري فرصتونه، روزنیز پروګرامونه او د پرمختګ زمینه برابره کړي.
د عامې روغتیا وزارت د مقام د دفتر لوی رئیس، شیخ محمد طاهر حلیم د فارغانو هڅې وستایلې او ډاډ یې ورکړ، چې وزارت به د مسلکي زده کړو برخه کې د لا پرمختګ لپاره خپلو هڅو ته دوام ورکړي.
