د وزیر محمد اکبر خان تخصصي روغتون د درېیو میاشتو فعالیتونو او لاسته راوړنو راپور وړاندې شو
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په شتون کې د وزیر محمد اکبر خان تخصصي روغتون د مسؤلینو له لوري د یاد روغتون د تېرو درېیو میاشتو د فعالیتونو او لاسته راوړنو راپور وړاندې شو
د دغه ناستې موخه په تېرو درېیو میاشتو کې د وزیر محمد اکبر خان روغتون د لاسته راوړنو او ترسره شویو فعالیتونو په اړه معلومات ورکول وو، چې د روغتون مسؤلینو له لوري په کې د بېلابېلو څانګو اړوند د تداوي شویو او بستر شویو ناروغانو د شمېر، د جدي پاملرنې، جراحي، عمومي داخله، ارتوپیدي او نورو څانګو اړوند ارقام او معلومات له ګډونوالو سره شریک شول.
د عامې روغتیا وزارت د روغتیايي خدمتونو وړاندې کولو مرستیال په دې ناسته کې د یاد روغتون د کاري راپور له اورېدو وروسته، د روغتون د مسؤلینو له ترسره شویو فعالیتونو څخه قدرداني وکړه او له مسؤلینو یې وغوښتل چې له شته امکاناتو څخه په ګټه اخیستنې ناروغانو ته لا ښه روغتیايي خدمتونه وړاندې، له هغوی سره مناسب چلند وکړي او ناروغانو لپاره لا زیاتې روغتیايي اسانتیاوې برابرې کړي.
ښاغلي مرستیال زیاته کړه، چې د عامې روغتیا وزارت رهبري هڅه کوي؛ څو روغتیايي ستونزو ته په رسېدنې د لا ښو روغتیايي خدمتونو وړاندې کولو او د روغتیايي کارکوونکو په ظرفیت لوړولو سره په هېواد کې د ناروغانو لپاره لا زیاتې اسانتیاوې برابرې کړي.
