د غور ۲۵۰ بستریز ولایتي روغتون کې د هیموډیالیز څانګه پرانستل شوه او په فعالیت یې پیل وکړ
په همدې موخه جوړو شویو مراسمو کې د غور د عامې روغتیا رئیس عبدالواحد حماس، د ولایت د مقام استازي، د اړوندو ادارو او همکارو بنسټونو مسؤلینو، ډاکټرانو او روغتیایي کارکوونکو شتون درلود.
د غور د عامې روغتیا رئیس د هیموډیالیز څانګې فعالېدل د روغتیایي خدماتو په ښه والي کې یو مهم ګام وباله او دغه څانګه یې د هغو ناروغانو د ژوند ژغورنې وسیلې په توګه یاده کړه، چې د پښتورګو له کمزورتیا سره مخ دي.
همدارنګه، نوموړي د همکارو بنسټونو له لوري د دوامداره همکاریو پر پیاوړتیا او د روغتیایي خدماتو پر لا پراختیا ټینګار وکړ.
همداراز، د غور د ولایتي روغتون مسؤلینو د عامې روغتیا ریاست له ملاتړ څخه مننه وکړه او د هیموډیالیز څانګې فعالېدل یې یوه اساسي اړتیا وبلله. هغوی وویل، د هیموډیالیز خدماتو له فعالېدو وروسته د دې برخې ناروغان اړتیا نه لري، چې نورو ولایتونو ته سفر وکړي او په دې ولایت کې به ورته د لوړ کیفیت لرونکي روغتیایي خدمات وړاندې شي.
