د عامې روغتیا وزیر په هند کې د میکس او میټرو د زړه فوقتخصصي روغتونونو څخه لیدنه وکړه
د افغانستان اسلامي امارت د عامې روغتیا وزیر، ښاغلي مولوي نورجلال جلالي هند هېواد ته د خپل رسمي سفر په جریان کې د افغانستان لپاره د هند سفارت سرپرست کرن یادف سره په ګډه د میکس فوق تخصصي او میټرو د زړه اړوند فوق تخصصي روغتون او انسټیټیوټ څخه لیدنه تر سره کړه:
په دې لیدنه کې چې د عامې روغتیا وزیر ښاغلي مولوي نور جلال جلالي او ورسره مل پلاوي هم شتون درلود د دواړو روغتونو له بېلا بېلو څانګو او خدماتو څخه لیدنه وکړه، چې موخه یې په هېواد کې دننه د روغتیايي خدماتو د پیاوړتیا لپاره د تجاربو تر لاسه کول وو.
د یادونې ده چې په دا وروستیو کې د عامې روغتیا وزارت په کور دننه په دولتي سکتور کې د زړه جراحۍ خدمات پیل کړي او هڅه یې د دې خدماتو پراختیا ده، همدارنګه د راډیولوژي تشخیصیه وسایلو نصبول او د درملنې عصري میتودونو پر تطبیق کار شوی، چې لا د دې برخې مجهز کېدنې ته هڅې جریان لري.
