د عامې روغتیا وزارت له لوري د روغتونونو مدیریت د ظرفیت لوړونې په موخه د (Hospital Management) تر سرلیک لاندې د شپږ ورځنۍ روزنیزې دورې لومړی پړاو ترسره شو
په دغه روزنیزه دوره کې، چې د مرکزي روغتونونو رئیسانو، سرطبیبانو، امرینو او یو شمېر نورو مدیریتي مسؤلینو ګډون کړی و، موخه یې د روغتونونو د مدیریت برخې د کارکوونکو د وړتیاوو لوړول، د مدیریت د اصولو پیاوړتیا او د روغتیايي خدمتونو کیفیت ښهوالی و. په یاده روزنیزه دوره کې ګډونوالو د روزنې له بهیر څخه خوښي څرګنده او دغه ډول روزنیزې دورې او علمي سیمینارونه یې د مدیریتي وړتیاوو لوړولو او روغتیايي خدمتونو ښهوالي برخه کې ګټور وبلل.
د عامې روغتیا وزارت د تخصصي او ثالثي روغتونونو رئیس، ډاکټر امین الله مومند له ټولو ګډونوالو څخه وغوښتل، چې د دغې روزنیزې دورې په ترڅ کې ترلاسه کړې پوهه او مهارتونه په خپلو روغتونونو کې په عملي ډول پلي کړي او د ناروغانو د خدمتونو، روغتیايي مدیریت او نورو اړوندو برخو ښهوالي لپاره ترې اغېزمنه ګټه واخلي؛ څو هېوادوالو ته پر وخت، معیاري او باکیفیته روغتیايي خدمتونه وړاندې شي.
