د عامې روغتیا وزارت د ۱۴۰۴ مالي کال لپاره د تشکیلاتي جوړښت ښه والي او یقیني کولو په موخه ناسته تر سره شوه

یاده ناسته چې د ا.ا.ا د عامې روغتیا وزیر، ښاغلي مولوي نور جلال جلالي په مشرۍ د وزارت مرستیالانو، عمومي او مرکزي رئیسانو په شتون کې ترسره شوه، په کې د ۱۴۰۴ لمریز کال لپاره د روغتیا وزارت تشکیلاتي جوړښت اړوند خبرې وشوې او د هغه کمېټې له لوري، چې له وړاندې د مالي او اداري چارو مرستیال،  ښاغلي ملا بخت الرحمن شرافت په مشرۍ د تشکیلاتي جوړښت ښه والي او یقیني کولو په موخه جوړه شوې وه ګډونوالو ته معلومات ورکړل شو.

 ښاغلي وزیر، د اړوندو ادارو له مسؤلینو څخه وغوښتل، چې د ۱۴۰۴ مالي کال لپاره د خپلو ادارو د تشکیلاتي جوړښت ښه والي او یقیني کولو برخه کې د عامې روغتیا وزارت له رهبرۍ سره همکاري وکړي؛ تر څو له یوې خوا روغتیايي خدمتونه له خنډ او ځنډ سره مخ نه شي او له بل لوري راتلونکې پلان شوې چارې هم په غوره توګه عملي شي.