د عامې روغتیا وزارت د څارنې او پلټنې لوی ریاست له لوري، خصوصي روغتیايي سکتور سره د نظارت د پایلو شریکولو ناسته ترسره شوه
په دې ناسته کې د عامې روغتیا وزیر، ښاغلي مولوي نور جلال جلالي، د روغتیايي خدماتو وړاندې کولو مرستیال، ښاغلي مولوي عبدالولي حقاني، مرکزي رئیسانو او د خصوصي روغتیايي سکتور استازو ګډون کړی و.
د عامې روغتیا ښاغلي وزیر، خصوصي سکتور د روغتیا وزارت مهم مټ وباله او ټینګار یې وکړ، چې د دې سکتور خدمتونه باید په همغږۍ او معیاري بڼه وړاندې شي.
ښاغلي وزیر زیاته کړه، عامې روغتیا وزارت د خصوصي روغتیايي سکتور له هڅو او فعالیتونو مننه کوي او د خصوصي روغتیايي سکتور وده کولای شي ډیری هېوادوال چې بهرنیو هېوادونو ته د درملنې په موخه ځي، مخنیوی وکړي.
مولوي نور جلال جلالي، له خصوصي سکتور څخه غوښتنه وکړه، چې د پرمختللو طبي تجهیزاتو د واردولو، د روغتیايي خدمتونو د کیفیت لوړولو، له سوداګرۍ څخه د طبابت لرې ساتلو او د کورنیو تولیداتو د کارونې له لارې خپلو هېوادوالو ته لا ښه او معیاري روغتیايي خدمتونه وړاندې کړي.
بلخوا، د روغتیايي خدماتو د وړاندې کولو مرستیال، ښاغلي مولوي عبدالولي حقاني هیله څرګنده کړه، چې د خصوصي روغتیايي سکتور مسئولین دې د عامې روغتیا وزارت له لوري د خصوصي روغتیايي سکتور د نظارت د پایلو په اړه وړاندې شوې موندنې او معلومات د یو لارښود په توګه له ځان سره وساتي او د روغتیايي خدمتونو د ښه والي لپاره ورڅخه ګټه پورته کړي.
د خصوصي روغتیايي سکتور رئیس ډاکټر احمد خندان وویل، چې خصوصي روغتیايي سکتور باید معیاري او د ښو خدماتو وړاندې کولو جوګه او د خلکو رضایت تر لاسه کړي.
همدارنګه، د عامې روغتیا وزارت د عمومي نظارت او ارزونې رئیس ډاکټر عنایتالله عنایت، د یوې پرېزنټېشن له لارې، په تېرو شپږو میاشتو کې له خصوصي روغتیايي مرکزونو څخه د ګډ نظارت راپور له ګډونوالو سره شریک کړ.
په پای کې د خصوصي روغتیايي سکتور په استازیتوب ډاکټر عبیدالله مجددي د دې سکتور وړاندیزونه او ستونزې د عامې روغتیا وزارت له رهبرۍ سره شریکې کړې، چې د وزارت له لوري د همکارۍ او د ستونزو د حل ژمنه ورسره وشوه.
