د افغانستان اسلامي امارت د عامې روغتیا وزیر، ښاغلي مولوي نور جلال جلالي د ملګرو ملتونو د عمومي منشي مرستیال او د یونیسف اجرائیوي رئیس ښاغلي چیبان تید سره په خپل کاري دفتر کې لیدنه تر سره کړه
په دې لیدنه کې چې د افغانستان لپاره د یونیسف سازمان مشر، ښاغلي ډاکټر تاج الدین اوېلا او مل پلاوي شتون درلود د هیواد د روغتیایي سیستم پر ملاتړ ، د تطبیق کوونکو مؤسسو او یونیسیف له لوري روغتونونو ته پر وخت د درملو رسولو، د روغتیا په برخه کې د نړیوالو مرستو په سالم مدیریت ، د روغتیایي لګښتونو پر شفافیت ، د روغتونونو د خدماتو معیاري کولو په موخه د عصري او پرمختللو تجهیزاتو برابرولو ، د مور او ماشوم د روغتیا په برخه کې د لا زیاتو اسانتیاوو رامنځته کولو او ورته نورو موضوعاتو اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د یونیسف سازمان له لوري د روغتیایي سیستم سره د مرستو مننه وکړه او په وینا یې هڅه کوي د نړیوالو مرستو تر څنګ د خپلې داخلي بودیجې څخه په استفادې د روغتیایي سیستم د پراختیا او معیاري کولو لپاره لا کار وکړي ، ښاغلي وزیر په چارو کې د لا شفافیت او روغتیايي مراکزو ته پر وخت د درملو رسولو برخه کې د یاد سازمان د ځانګړې پاملرنې او د ستونزو د حل غوښتنه وکړه.
بل لور د یونیسیف سازمان اجرائیوي مشر ښاغلي چیبان تید چې د بشري عملیاتو او اکمالاتو مسئولیت په غاړه لري په یادو برخو کې د همکارۍ ډاډ څرګند کړ او ویې ویل، هڅه به وکړي هغه څه یې چې دلته ولیدل تر نورو ورسوي ښاغلي تید وویل ، اوسني وخت کې خورا شفافیت راغلی چې دا د مرستو لپاره بهترین فرصت دی ، ښاغلي تید د خپلو خبرو په ترڅ کې زیاته کړه زموږ موخه دا ده، چې د عامې روغتیا وزارت سره په ګډه ټولو افغانانو ته غوره روغتیايي خدمات وړاندې کړو او په دې برخه کې به د تل په څېر خپلو همکاریو ته دوام ورکړو.
