په ښوونځیو کې د بې کیفیته خوراکي توکو پلور او وېش منع اعلان شو!
د عامې روغتیا وزارت او پوهنې وزارت په دولتي او خصوصي ښوونځیو په کانتینونو او کفیټریاوو کې د بې کیفیته خوراکي توکو وېش او پلور بند کړ.
دا پرېکړه په ښوونځیو کې د بې کیفیته خوراکي توکو او مشروباتو مخنیوي په موخه شوې، څو د ماشومانو روغتیا خوندي او د ناروغیو مخه ونیول شي.
د تخنیکي څېړنو له مخې دا محصولات خطرناک کیمیاوي مواد لري، چې کولای شي په ماشومانو کې جدي ناروغۍ، لکه سرطان، د زړه ستونزې او ذهني اختلالات رامنځته کړي.
د یادونې وړ ده، د ښوونځیو له مسؤلینو هم غوښتنه شوې چې د دې پرېکړې په عملي کولو کې له دواړو وزارتونو سره هر اړخیزه همکاري وکړي او د سرغړونې په صورت کې به له متخلفینو سره قانوني چلند وشي.
