په ختیځو ولایتونو او په ځانګړې ډول کنړ ولایت کې د زلزله ځپلو هېوادوالو ستونزو ته د رسېدنې او لاسنیوي په موخه د قطر هېواد د امیر، حضرت شیخ تمیم بن حمد آل ثاني د لارښوونې پر بنسټ څلور الوتکې بشري مرسته وشوه
د دې مرستو د سپارلو په موخه د قطر څخه د راغلي پلاوي مشري، د یاد هېواد د بهرنیو همکاریو مرستیالې، اغلې ډاکټر مریم بنت علي بن ناصر المسند کوله، چې د یاد هېواد د بېلا بېلو ادارو استازي هم ورسره مل وو.
د قطر هېواد د بهرنیو همکاریو مرستیالې د یادو بشري مرستو د سپارلو پر مهال وویل: «په دې مرستو کې دوه ګرځنده روغتونونه، خوراکي او روغتیايي توکي او د هستوګنې اړین وسایل شامل دي، چې د قطر دولت د پراختیایي صندوق له لارې نږدې ۱۱ زرو اړمنو کسانو ته رسېږي، دغه مرستې د قطر دولت له لوري د افغان ولس ترڅنګ د تلپاتې درېدو په هدف ترسره کېږي او دا د بشرپالنې ژور ژمنتیا او د طبیعي ناورینونو پر مهال د یاد هېواد د مرستو انعکاس دی؛ تر څو د افغانستان په ختیځو ولایتونو کې د وروستۍ زلزلې له امله د قربانیانو د ستونزو په راکمېدو کې مرسته وکړي.»
د یادو مرستو د تسلیمۍ په مراسمو کې د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي او د بهرنیو چارو وزارت مرستیال دوکتور محمد نعیم وردګ ګډون کړی و، چې د افغان ولس په استازیتوب یې له قطر هېواد څخه مننه وکړه او زیاته یې کړه، چې دغه مرستې به د زلزله ځپلو د اړتیاوو په پوره کولو او په ځانګړې توګه د روغتیا په برخه کې ډېرې اغېزمنې وي.
مسؤلینو د قطر هېواد دغه بشرپاله ګام د افغان ولس ترڅنګ د تلپاتې درېدو څرګندونه وبلله او د دواړو هېوادونو د دوستانه اړیکو د لا پیاوړتیا لپاره یې اړین ګام وباله.
